अदालतको फैसला दुर्भाग्यपूर्ण : एमाले

भक्तपुर, साउन १६ । नेकपा एमालेले भरतपुर महानगरपालिकाको मतपत्र च्यातिएको विवादमा सर्वोच्च अदालतले गरेको पुनः मतदान गर्ने भनी दिएको फैसला दुर्भाग्यपूर्ण भएको बताएको छ ।

बालकोटस्थित अध्यक्ष केपी शर्मा ओलीको निवासमा सोमबार बसेको एमाले स्थायी कमिटीको बैठकले उक्त फैसलाले प्रचलित कानुन, लोकतान्त्रिक मूल्य र निर्वाचनका सर्वस्वीकार्य मान्यतालाई उपहास गरेको ठहर गरेको छ ।

पार्टी सचिव योगेश भट्टराईले ‘गत जेठ ४ गते राति सुनियोजित ढंगले मतपत्र च्यातिएको तर मतगणनास्थल कब्जा नभएको स्थितिलाई ध्यानमा राखी पुनः मतगणना हुनुपर्ने मागसहितको मुद्दामा सर्वोच्च अदालतले आइतबार पुनः मतदान हुने गरी गरेको फैसला’ दुःखद् र दुर्भाग्यपूर्ण भएको बताए ।

यस्तो फैसलाले जनताको अभिमतको अपमान गर्ने र आगामी दिनमा गलत नजिर बस्नेबारेमा बैठकमा छलफल भएको उनले जानकारी दिए ।

बैठकले भरतपुर–१९ का जनतालाई आफ्नो अभिमतको रक्षा गर्दै नगर प्रमुखका उम्मेदवार देवी ज्ञवालीलाई विजयी बनाइ न्याय दिन आग्रह गर्दै ज्ञवालीलाई जिताउने गरी लाग्न कार्यकर्तालाई निर्देशन दिएको छ ।

बैठकले तीनओटै तहको निर्वाचन सम्पन्न नभएसम्म संविधान संशोधनको कुनै औचित्य नरहने एमालेको अडान कायमै रहेको निर्णय गर्दै सबै चुनाव सकिएपछिमात्रै संविधान संशोधन गर्ने दलबीच भएको विगतको सहमति अरु दललाई स्मरण गराइसकिएको भट्टराईले बताए ।

उनले भने–‘संविधान संशोधनमा एमालेको पुरानो अडान कायमै छ, संविधान संशोधनमा एमाले लाग्दैन, पार्टी पूर्णरुपमा तीनओटै तहको निर्वाचनका लागि केन्द्रित हुने निर्णय गरिएको छ ।’

जिल्ला समन्वय समितिका प्रमुख र उपप्रमुखका लागि पार्टी जिल्ला कमिटीबाट आएका सिफारिस तथा प्रदेश संगठन कमिटीको सिफारिसलाई बैठकले सदर गरेको छ ।

सोअन्तर्गत् दैलेखका प्रमुखमा प्रेमबहादुर थापा र उपप्रमुखमा लक्ष्मी शाह, ताप्लेजुङ प्रमुखमा घनेन्द्र मादेन र उपप्रमुखमा देवीमाया नेपाली, सिन्धुपाल्चोक प्रमुखमा गोपाल तामाङ र उपप्रमुखमा बालकुमारी सापकोटा, धादिङ प्रमुखमा जगन्नाथ नेपाल र उपप्रमुखमा बिन्दा दराम नेपाली, काठमाडौं प्रमुखमा शिव वैद्य र उपप्रमुख सरिता दाहाल तथा सिन्धुली उपप्रमुखमा शंकर बर्मालाई उम्मेदवार बनाउने निर्णय भएको छ । रासस