थ्री नट थ्री राईफल

प्रवीण भट्टराई

कैयौ रिकुटेहरूको बीचमा
टाढैबाट छुट्टै देखिने
अनि चिनिने गरी
ठिंग उभिएको छु
सतिसालझै ढाल बनेर
म अर्थात
एउटा पुरानो
थ्री नट थ्री राईफल ।

उ एक्लै उभिएको छ
आफ्नै बलमा
आफ्नै जमिनमा
एउटा लक्ष्मण रेखा कोरेर
भन्दैछु मेरो सीमा तिमी ननाघ
म पनि तिम्रो सीमा नाघ्दिन
म अर्थात
कैयौ रिकुटेहरूको बीचमा
एउटा पुरानो
थ्री नट थ्री राईफल ।

तिमीलाई थाहा छ
म अनवरत प्रयोगमा छु
कहिले बेमौसमी जुलुस भगाउन
कहिले आफ्नै बीचमा
आत्म बिश्वासको साहस जगाउन
एक्लै डटिरहेको छु
अनवरत खटिरहेको छु
म अर्थात
कैयौ रिकुटेहरूको बीचमा
एउटा पुरानो
थ्री नट थ्री राईफल ।

सहेको छु खुशीसाथ
घाम, झरी र मुसलधारे पानी
रोएर पनि खपेको छु
मुटु कमाउने जाडो
पार गरेको छु सहजै
कैयौ माईल यात्रा
तुसारोमा खाली खुट्टा
म अर्थात
कैयौ रिकुटेहरूको बीचमा
एउटा पुरानो
थ्री नट थ्री राईफल ।
राईफल पुरानो हो
खियाँ लागेको पनि हुनसक्छ
तर
थ्री नट थ्री राईफलको
एउटै बिशेषता
खियाँ सफा गरे पछि काम गर्छ
यस्ले आफ्ना र शत्रुलाई चिन्छ
मित्र देख्दा जति ट्रिगर थिचे पनि
पडकदै पडकदैन्न
शत्रु देख्दा गडगडाएर पडकन्छ
त्यसैले त
थ्री नट थ्री राईफल
जति पुरानो भएर पनि
आजसम्म चलेकै छ
म अर्थात
कैयौ रिकुटेहरूको बीचमा
एउटा पुरानो
थ्री नट थ्री राईफल ।

श्रीजङ्गा-४, तेल्लोक, ताप्लेजुग ।
हाल: दोहा, कतार ।