पोखराका युवाहरु रोजगारी सृजनासँगै उत्पादन र उपभोक्तालाई जोड्दै

जेठ १, पोखरा । कोरोना भाइरसले अर्थतन्त्रलाई जोखिममा पारेको अवस्थामा यहाँका युवा भने रोजगारी सृजनासँगै उत्पादन र उपभोक्ता जोड्ने अभियानमा जुटेका छन् ।

विभिन्न सेवा, पेशा र व्यवसायमा आवद्ध पाँच युवाले कृषिको आधुनिकीकरणका माध्यमबाट पशुपालनसहित प्रांगारिक तरकारी तथा फलफूल आदिको उत्पादनलाई जोड दिने गरी जलजा मल्टी एग्रो कम्पनी प्रालि सञ्चालनमा ल्याएका हुन् ।

पोखरा महानगरपालिका–३३ स्थित शहरे तहरामा करीब ५० रोपनी जग्गामा पशुपालनसहित प्राङ्गारिक तरकारी तथा फलफूल खेती सञ्चालन गर्न लागिएको संस्थाका अध्यक्ष तथा व्यवस्थापक गोविन्द गौतमले जानकारी दिए ।

संस्थामा उनीसहित देवीलाल शर्मा तिमल्सिना, दुर्गा न्यौपाने, शोभाखर भण्डारी र सुमन गौतम आवद्ध छन् । कोरोना भाइरसको जोखिममा कारण स्वदेश तथा विदेशमा नेपालीले रोजगारी गुमाइरहेका विद्यमान अवस्थामा केही युवाका लागि प्रत्यक्ष तथा अप्रत्यक्ष रोजगारीका साथै उत्पादन र उपभोक्तालाई सिधा जोड्दै आयआर्जन गर्ने लक्ष्यका साथ संस्था सञ्चालन गरिएको अध्यक्ष गौतमले बताए ।

 

‘आफूहरूको क्रियाशीलता स्वदेश तथा विदेशमा रोजगारी गुमेका युवाका लागि पनि अनुकरणीय बनोस् भन्ने हाम्रो चाहना हो’, उनले भने, ‘महामारीले विशेषतः नेपाली मारमा परेका त छन् नै यसबाट पाठ सिक्दै श्रम सीपको उपयोग स्वदेशमै गर्नुपर्छ भन्ने भावना प्रत्येकमा आउनु जरुरी छ ।’

अघिल्लो वर्ष मंसिरदेखि औपचारिक दर्ता भइ सञ्चालनमा आएको संस्थाले भंैसीपालनसँगै बंगुर, कुखुरा तथा माछापालनका लागि प्रारम्भिकरूपमा आवश्यक भौतिक पूर्वाधार तयार गरिसकेको छ ।

चैतको दोस्रो सातामा नै ४० ओटा भैंसी, ५० बंगुर र २ हजार ५०० कुखुराबाट व्यवसायको औपचारिक थालनी गर्ने सोच राखिएकामा कोरोना भाइरसको महामारी फैलिन नदिन गरिएको बन्दाबन्दीले उक्त योजना प्रभावित भएको उनले जानकारी दिए ।

आगामी पाँच वर्षभित्र रू.४ करोडको लगानीमा २०० ओटा भैंसी, १०० ओटा बंगुर, ५ हजार ब्रोइलर, २ हजार लेयर्स कुखुराका साथै १५० ओटा बाख्रापालन गर्ने सोच राखिएको छ । त्यस्तै माछापालनका साथै प्रांगारिक तरकारी तथा फलफूल उत्पादन गर्ने लक्ष्य राखिएको छ । यस अवधिभित्रै डेरी तथा दाना उद्योग पनि सञ्चालन गर्ने संस्थाको योजना छ ।

संस्थाले पशुपालनसँगै उत्पादित मल कृषिजन्य उत्पादनमा उपयोग गर्दै प्रांगारिक उत्पादन गर्ने गरी एकअर्कोलाई जोड्ने लक्ष्य राखेको उनले बताए । संस्थाले काम शुरु गरेसँगै प्रारम्भिक चरणमा नै छ÷सात जनाले प्रत्यक्ष रोजगारी पाउने भएका छन् ।

 

 

अध्यक्ष गौतमका अनुसार संस्थाले गरेका उत्पादन सुपथ मूल्यमा सिधै उपभोक्ताले पाउने गरी भविष्यमा ठाउँ–ठाउँमा सेवा केन्द्र राखेर विक्री वितरण गरिने छ ।

बहुउद्देश्यीय व्यवसायसँगै आयआर्जन गर्ने र अन्य युवालाई रोजगारीका साथै उपभोक्तालाई सुपथ मूल्यमा दूध, मासु, फलफूल तथा तरकारी उपलब्ध गराउने आफूहरूको प्रयास अन्यका लागि पनि अनुकरणीय बन्ने विश्वास लिइएको संस्थाका सदस्य देवीलाल शर्मा तिमल्सिनाले बताए ।

‘बिचौलियाका कारण उत्पादक र उपभोक्ताबीचको दूरीसमेत टाढा बन्दै गएको अवस्थामा उत्पादनलाई सिधै उपभोक्तासमक्ष पु¥याउनु पनि हाम्रो लक्ष्य हो’, उनले भने ।

उत्पादक र उपभोक्ताबीचको दूरी कम गर्न सके मात्रै पनि दुवै पक्ष लाभान्वित बन्ने विश्वास लिइएको संस्थाका सचिव दुर्गा न्यौपानेले बताए ।

व्यावसायिक कृषिको विकासका लागि वास्तविक कृषकहरू राज्यबाट पाउने सेवा सुविधाबाट बञ्चित हुन नहुने बताउँदै उनले कागजात मिलाएर अनुदान दिने प्रवृत्तिलाई निरुत्साहित गर्नुपर्ने धारणा राखे ।

नर्सरीदेखि बजारीकरण सबैलाई समेट्दै आयआर्जन गरी प्रत्यक्ष एवं अप्रत्यक्ष ठूलो संख्यामा रोजगारी सृजना गर्ने संस्थाको दीर्घकालीन लक्ष्य अरुका लागि पनि अनुकरणीय बन्ने उनको भनाइ छ । रासस