भारतमा एकैदिन थपिए ११ हजार ५०० संक्रमित

असार १, नयाँ दिल्ली । भारतमा एक दिनमा ११ हजार ५०२ जना कोरोना भाइरस संक्रमित थपिएका छन् । यद्यपी शनिवारको तुलनमा भारतमा संक्रमितको संख्यामा केही कमि आएको पाइएको छ ।

शनिवार एक दिनमा ११ हजार ९२९ जनामा कोरोना भाइरस संक्रमण देखिएको थियो भने आइतवार ११ हजार ५०० जनामा संक्रमण देखिएको बताइएको छ ।

 

 

केन्द्रिय स्वास्थ्य तथा परिवार कल्याण मन्त्रालयले सोमवार दिएको जानकारीअनुसार सोमवार बिहानसम्म एकैदिनमा ११ हजार ५०२ जना संक्रमित भएका छन् ।

त्यसैगरी पछिल्लो २४ घण्टामा कोरोना भाइरसका कारण भारतमा ३२५ जनाको मृत्यु भएको मन्त्रालयले जानकारी दिएको छ । मन्त्रालयले सार्वजनिक गरेको तथ्यांक अनुसार भारतमा अहिलेसम्म कोरोना भाइरसका कारण मृत्यु भएकाहरुको संख्या ९ हजार ५२० पुगेको छ ।

 

 

भारतमा कोरोना भाइरसबाट संक्रमितहरुको कुल संख्या अहिले ३ लाख ३२ हजार ४२४ पुगेको छ । कुल संक्रमित मध्ये १ लाख ५४ हजार १०६ जना अहिले पनि संक्रमित अवस्थामै रहेका छन् भने १ लाख ६९ हजार ७९८ जना संक्रमण मुक्त भएका छन् ।

भारतमा प्रदेश अनुसार हेर्ने हो भने सबैभन्दा धेरै महाराष्ट्र प्रदेशमा संक्रमित रहेका छन् । त्यस प्रदेशमा १ लाख ७ हजार ९५८ जना संक्रमित भएका छन् ।

महाराष्ट्रमा ५३ हजार ३० जना संक्रमित अवस्थामा नै रहेका छन् भने ५० हजार ९७८ जना उपचारपछि घर फर्किएका छन् । महाराष्ट्र कोरोना भाइरसको संक्रमणको कारण ३ हजार ९५० जनाको मृत्यु भएको छ ।

कोरोना भाइरस संक्रमणको कारण दोस्रो स्थानमा रहेको तमिलनाडु प्रदेशमा ४४ हजार ६६१ जना र तेस्रो धेरै संक्रमण रहेको दिल्ली प्रदेशमा ४१ हजार १८२ जना संक्रमित रहेका छन् । रासस/एएनआई