८ हजार ५०० रोजगारी कटौती गर्दै क्याथी प्यासिफिक

कात्तिक ५, हङकङ । हङकङको विमान सेवा प्रदायक कम्पनी क्याथी प्यासिफिक एयरवेजले ८ हजार ५०० रोजगारी कटौती गर्न लागेको छ ।

कोरोना भाइरसको महामारीका कारण सेवा सञ्चालन गर्न नसकेपछि कम्पनीले क्षेत्रीय विमान सेवा क्याथी ड्र्यागन पनि बन्द गर्न लागेको हो । रोजगारीबाट हटाउन लागिएका मध्ये ५ हजार ३०० कर्मचारी हङकङमै रहेर काम गर्नेहरु छन् ।

थप ६०० कर्मचारी भने हङकङ बाहिरका भएको बताइएको छ । २ हजार ६०० पद भने पहिलेदेखि नै खाली रहेको थियो । अहिले रिक्त रहेको २ हजार पद पनि कर्मचारी भर्ती स्थगनबाट खारेज गरिने बताइएको छ । अहिले कटौती हुन लागेको कर्मचारी संख्या क्याथीको कुल कार्यबलको २४ प्रतिशत हो ।

अहिलेसम्म कम्पनीले कर्मचारी कटौतीबाट बच्न सक्दो कार्य गरेको भएपनि अब भने यस्तो गर्न नसकिएको क्याथी प्यासिफिक ग्रूपका सीईओ अगष्टस ट्याङले एक विज्ञप्तिमा भनेका छन् ।

रोजगारी कटौतीको खबर सार्वजनिक भएपछि बुधवार हङकङमा कम्पनीको शेयर मूल्य ४ प्रतिशतले बढेको थियो । एजेन्सी