संसद पुनर्स्थापना भए पनि आफ्नो राजनीति सकिँदैन : प्रधानमन्त्री ओली

काठमाडौं । प्रधानमन्त्री केपी शर्मा ओलीले प्रतिनिधिसभा पुनर्स्थापना भए पनि आफ्नो राजनीति नसकिने बताउनुभएको छ ।

कञ्चनपुरको दैजीमा छेला औद्याेगिक क्षेत्र शिलान्यास कार्यक्रममा प्रधानमन्त्री ‌ओलीले केही दिनमा सर्वोच्च अदालतले प्रतिनिधिसभा विघटनसम्बन्धी फैसला गर्ने भन्दै पुनर्स्थापना भए पनि वा नभए पनि आफ्नो राजनीति नसकिने बताउनुभएको हो ।

केही मान्छेहरू विघटन र पुनर्स्थापनाकाे निर्णयले आफ्नो राजनीति सकिन्छ भनेर छटपटाइरहेको बताउँदै उहाँले आफूहरूको राजनीति जे भए पनि नसकिने जिकिर गर्नुभयाे । आफूले अदालतलाई धम्की वा दबाब नदिएको उहाँकाे दावी छ ।

प्रधानमन्त्री ओलीले गत शनिबार विराटनगरमा आयोजित कार्यक्रममा गरेको सम्बोधनलाई स्मरण गर्दै आन्दोलन गर्ने भनेर नाराजुलुसतर्फ संकेत नगरेकाे स्पष्ट पार्नुभयाे ।

 

 

‘मैले त देश बनाउने आन्दोलन, लोकतन्त्रलाई बलियो बनाउने आन्दोलन भनेको थिएँ। उनीहरुले त नारा जुलुश बुझेछन्’, ओलीले भने, ‘राजनीति, अर्थतन्त्र, सामाजिक पक्ष, संस्कृति सबै पक्षको आन्दोलन निरन्तर चलिरहन्छ भनेको हुँ। नारा जुलुश गर्ने, ढुंगा मुढा गर्ने आन्दोलन भनेको होइन।’

अदालतलाई धम्की नदिएको दाबी गर्दै उनले थपे, ‘हामी लोकतन्त्रमा न्यायालयलाई धम्क्याउने, दबाब दिने कुरामा विश्वास गर्दैनौं। मैले कसैलाई धम्की दिनुपर्ने आवश्यकता छैन। हामी स्वतन्त्र न्यायालयको पक्षमा छौं, शक्ति पृथकीकरणको पक्षमा छौं।’

न्यायालयका सबै निर्णय सबै समयमा उपयुक्त नहुन पनि सक्ने प्रधानमन्त्रीले बताए।

 

 

‘अदालतले गर्ने निर्णय सबै समयमा उपयुक्त नहुन पनि सक्छ। त्यसकारण मानिसले पुनरावेदन गर्छन्’ उनले भने।

संसद पुनर्स्थापना भए देशमा फेरि अस्थिरता उत्पन्न हुने र पहिलेकै समस्याहरु दोहोरिने उनले चेतावनी दिए।

‘पुनर्स्थापना भए के हुन्छ? फेरि प्रधानमन्त्री खोज्न हिँड्नुपर्छ। त्यसका लागि पार्टीहरु खोज्नुपर्छ’, उनले भने, ‘कसैको बहुमत पुग्दैन। भागबण्डाको राजनीति, खरिदबिक्री, अस्थिरता फेरि सुरु हुन्छ।’

ओलीले आफूहरु जनताको घर बनाउने, शिक्षा, स्वास्थ्य, रोजगारीको अभियानमा लागेको तर संसद पुनर्स्थापना भए ती सबै योजनाहरु अवरुद्ध हुने दाबी पनि गरे।