अमेरिकामा जातीय हिंसाः ६४ वर्षकी एसियाली महिलाको छुरा प्रहार गरी हत्या

अमेरिकामा फेरि अर्का एसियाली नागरिकमाथि आक्रमण भएको छ।

गत शनिबार बिहानै क्यालिफोर्नियाको रिभरसाइडमा आफ्नो कुकुर लिएर मर्निङ वाकमा निस्किएकी ६४ वर्षकी एसियाली महिला कि चे मेङमाथि छुरा प्रहार भएको सीएनएनले जनाएको छ।

 

 

छुरा प्रहारबाट गम्भीर घाइते मेङको उच्च रक्तश्रावका कारण मृत्यु नै भएको छ। यो घटनाले अमेरिकामा एसियाली मुलका नागरिकहरु त्रसित बनेका छन्।

कोरोना भाइरसको प्रकोप फैलिएसँगै अमेरिकामा जातीय हिंसा बढ्दै गएको छ।

चिनियाँ नागरिकजस्ता देखिने मानिसमाथि आक्रमणको घटना दोहोरिँदै जाँदा अमेरिकी सरकारले त्यस्ता हिंसा रोक्न विभिन्न प्रयास गरेका छन्।

 

 

यद्यपी आक्रमणको घटना दैनिक भइरहेको देखिन्छ। कोरोना भाइरस पहिलोपटक चीनको वुहान बजारबाट फैलिएको थियो।

अमेरिकाका पूर्व राष्ट्रपति डोनाल्ड ट्रम्पले चीनले पारदर्शी तवरबाट कोरोनाको खतराबारे जानकारी नदिएका कारण कोरोना विश्वभर फैलिएको बताउने गर्दथे।

उनले कोरोना भाइरसलाई चिनियाँ भाइरस, वुहान भाइरस भन्ने गर्दथे। अधिकाँश आक्रमणको घटनामा पनि एसियाली नागरिकमाथि आक्रमण हुँदा चीनसँग सम्बन्धित गाली गलौज गर्ने गरिएको छ।